فرحة البدايات - أول أسبوع في ألمانيا

 


طبعًا أول شهر هو تحطيم الأفكار المسبقة عندك لبلد جديدة، ايه البلد دي وإيه أفكارها ، دايمًا بيكون في إنبهار في الأول بكل حاجة في الحياة اليومية من أول الشوارع النضيفة ، لباقة الموبايل.

كان عندي خوف إن باخد القرار الغلط في السفر لأن الموضوع كان فيه تحديات كتيرة ، زي العادي، عمر ما في حاجة بتيجي غير ومعاها تحدياتها، طلبت القوة، فربنا إداك المحن، ما هو مفيش طريق تاني هيخليك قوي غير عن طريق دخولك حاجة صعبة، ممكن تقول طاب ربنا هيسيبني ، ساعتها أققدر أققولك إن ربنا مش بيسيبك ودايما معيته بتكون محاوطاك، لازم تكون مؤمن بكدا ، كل اللي عليك إنك لما الحياة تضغط عليك جامد، ما تواجهاش لوحدك، خليك فاكر إن دايمًا في ربنا ..

أول ما صحيت من النوم وبصيت لقيت ألمانيا تحت، مساحة كبيرة باينة من الطيارة كلها شجر وخضرة وجو مغيم ، وأنا لسه جاي من مصر كانت الدنيا حر، كل الخوف راح ، مصدقتش إن أنا فعلًا هنا في ألمانيا أخيرًا ، الحلم اللى أنا كُنت من خوفي بدأت أنساه.

الأوضة اللي هسكن فيها كانت جميلة ، السكن كان واسع ، كان سكن مشترك مع 4 بنات سكنوا ورا بعض ( هنتكلم ع الحوار ده بعدين ) 

أول أسبوع في ألمانيا منبهر ، من ماكينة القهوة اللي في المدرسة واللى تقدر تعمل لنفسك من القهوة والنسكافيه والقهوة باللبن والهوت شوكليت كل دا ببلاش ومفيش حد واقف عليه ، دا كله جديد عليا، لأن أنا كُنت قبلها بأسبوع في المستشفى في مصر ، بنتخانق نملى الكولدير مين آخر واحد شرب وإنت يا معلم مش شربت تروح تملاه ، والكلام ده 😂 

بعد يومين من الوصول نزلت إتمشيت في المدينة ، بس إنصدمت شوية من الجدران اللى كانت مكتوب عليها ، زي عندنا في البلد فرحة اللول 1-1 كانت بتتحط على كل جدران البلد ، برضو نفس النظام في المدينة كانت على أغلب الجدران مكتوب عليها ، بس دا بعد كدا كان معقول لأن مش كل الناس متعلمين كويس ..

علشان آخد أكبر إستفادة ممكن من التجربة، دخلتها ازاي الواحد ممكن يقول دا ...صوفي مش صوفي اللى هو صوفي ، لأ الصوفية عندهم تصور اللى هو تجرد من الحياة، يعني الزهد ، نفس الفكرة علشان تاخد أكبر استفادة محتاج تخلع كل قناعاتك المسبقة مش الدينية! لكن تكون متقبل وحابب تعرف مين ده مع العلم إنك فاهم إنت مين برضو ... 

لأن صدقني يا صديقي لما هتسيب نفسك للتيار يعلمك هيبقى الموضوع صعب ..لكن انا مين ؟ أنا خبرتي كلها شهرين ونص حتى اللحظة دي ...

كانت أول إنبهاري ، إيه ده النوتيلا في متناول أي حد كدا ، يعني أنا ممكن أشتري نوتيلا ؟ قبل كدا كانت غالية عليا عادي ، وبرضو حجات تانية كتير مكنتش متخيل إن دي حجات عادية ..

الباص منضبط جدًا ، بيجي في معاده ، القطر بيتأخر لكن الباص نفسه بيجي بالظبط ، لسه معضلة القطر اللى بيتأخر ده محدش لسه عارفها 

حاجة كانت بالنسبالي صدمة حضارية، لما الباب بتاع القطر بيفتح اللى بره بيقفوا صف على جنبين الباب محدش بيزق حد علشان يدخل ، ودي حاجة غريبة برضو ، ولما آخر واحد بيطلع بيبدا الناس تدخل ، وأكتر حاجة لاحظتها لما بيقعد شخص ويحط شنطته جنبه على الكرسي اللي جنبه بنسبة 90% محدش بيقوله اي ي معلم شيل شنطتك وقعدني جنبك ودا شائع جدًا غالبًا وسط الأجانب ، لكن دا ممكن يكون سؤال عادي من أي حد تاني زينا اللى هو ممكن اققعد ؟ وكدا ووقتها غالبًا بيسحب شنطته وبيقعدك بس اللى شوفته دايمًا مفيش حد عمره بيسأل ويكأن الناس بتتجنب إنها تتكلم مع بعضها 😂😂 

في البداية أخدت غرامة في القطر لأني إكتشفت إنك لازم تقطع التذكرة الأول والتذكرة كانت مكلفة 14 يورو ، والغرامة 60 يورو ، فخد بالك للمرةة الجاية 😂 

أول حاجة هتصدمك إن البنات مش مستنينك زي ما كانوا مفهمينك 

يعني إن البنات الأجانب اللى هي كل يوم في علاقة مع حد شكل والكلام ده ، ممكن علشان إحنا بنستمد ثقافتنا من الأفلام الأجنبي ، فعلشان الفيلم ساعة مثلا فإنت بتعتقد إنها شافت فلان ده النهاردة ، فابالليل كانوا في السينما وتاني يوم كانوا في البيت سوا ..معرفش اذا كان ده بيحصل فعلًا بس محدش مستنيك محدش هيبقى مهتم إنه يعرفك ويقولك تعالا نخرج الليلة والكلام ده ...

لأن ببساطة الألمان حذرين جدًا في الحجات دي ، ومهما كانت علاقتكم في الشغل غالبًا مش هيديك رقمه ، مفيش حاجة اسمها ضفني عندك ع الإنستاجرام والكلام ده . غالبًا أغلب البنات في علاقة .

في ناس بتعتقد إن من السهل إنك تفتح حوار مع شخص رجل عايز تاخده كصديق أو بنت بس الفكرة إن الموضوع مش سهل ، لأن غالبًا هيقفل معاك رقم واحد، ثانيا إنت لغتك مش هتكون اللغة المشجعه ليه إنه يكلمك ...ومش معنى إننا في ثقافتنا منفتحين جدًا وفاتحينها على البحري ، وتلاقيك قاعد في المواصلات مشوار من القاهرة ساعتين ، تلاقي في إتنين أول مرة يشوفوا بعض، تقريبًا حكوا لبعض على قصة حياتهم وبصوت عالي والعربية كلها سمعت وشاركت في الحوار وأبدت رأيها ....دا عمره ما بيحصل هنا ، مستحيل يحصل هنا 

في النهاية حبيت أوثق كل ده لأن دا كله جديد عليا وعلشان توثيقه هيخليني أتعلم منه ويغير في شخصيتي ...


للمرة الجاية .......😀😀







تعليقات

إرسال تعليق

المشاركات الشائعة من هذه المدونة

الرابعة والنصف مساءًا بتوقيت دوسلدورف

صورة
  في بدايتي لألمانيا اعتقدت أنني قد وصلت إلى الشاطئ الآخر، النعيم المقدس أو ما يشابه ذلك، لم ينتابني شك أن هذا قد يكون طريقًا صعبًا، بل وقد شعرت بالخوف في لحظة ما، لن يصدق أحد هذا ولكن طوال رحلتي في الطائرة من مطار القاهرة إلا مطار دوسلدورف الألماني، كان جوايا خوف لدرجة أنني كُنت أتمنى أن يحدث خطأ ويخبرني الموظف أنه هناك خطأ وأعود إلى مصر، لتلك الدرجة أردت المجازفة ولكن خفت من المجازفة في نفس الوقت، ولكن عندما رأيت من شباك الطائرة الغابات وكُنت خارج من مصر حيث الشمس الجميلة والجو المشمس الجميل، وفجأة رأيت لأول مرة أوروبا من الطائرة، شعرت بالنشوة، كان لذلك تأثير قوي ، أردت وقتها أن تنجح تلك المجازفة بكل ما أوتيت من قوة .... سكنت في شقة حيث أربع فتيات وأنا الولد الوحيد ، ليس هذا فحسب العربي أيضًا، تخبرني شريكة السكن التركية التي منذ خمس سنوات كانت في ألمانيا، في أول يوم خبطت على بابها وقلت لها أريد رقم الباسوورد ولكن بلهجة ألمانية مصرية لا تفهم منها شيئًا ، وكانت مشغولة في مكالمة وأعطتني الباسوورد وسألتني هل أنت الجديد هنا وأخبرتها نعم، كان لا يسكن الشقة في ذلك الوقت سوانا نحن الإثني...
قراءة المزيد

حامل المخطوطة في ظلام أبدي ( قصة قصيرة )

             حامل المخطوطة في ظلام أبدي                           تأليف                         محمد عطا  في ظلام الليل الدامس، جاء مهرولًا في وسط البيوت، حتى وصل إلى بيته، دق البيت ثلاث مرات وكأنه يهمس على الباب، حتى فتحت له زوجته ودخل وتأكدت أنه لا يوجد أحد يقتفي أثره، ثم أغلقت الباب. لماذا لم تسرعي في فتح الباب أيتها الغبية؟ كدت أموت خوفًا من أن يراني أحدًا، ولكن هذا لن يحدث مرة أخرى بعد الليلة، سوف نصبح أثرياء ... وبدأ يضحك هو وزوجته، قام بخلع الشال من عليه المبلل من المطر في الخارج، وإجتمعا حول المائدة ووضع لفافة من البردي وخاتم، وأحضر المصباح على المائدة بجانب لفافة البردي، وقام بإخراج خاتم من عباءته وضحك بصوت عالي وقبل زوجته، ووضعها على المائدة بجانب لفافة البردي. هذه تساوي الكثير من النقود، سوف أقوم ببيعها..عندما ينتهي التنقيب عن الآثار .. تغيرت ملامح زوجته من الفرح إلى الحيرة وقالت : ومتى...
قراءة المزيد