كونك مُختلف في مُجتمع مُختلف

 

من الحجات الجميلة هي العودة للكتابة تاني ، بقالي فترة عاوز اكتب بس مش لاقي وقت ولا لاقي شغف ان أعمل ده وجوايا كتير عايز اققوله ..من الجميل انك تكون مُختلف خصوصًا في مُجتمع تقليدي ، دي حاجة زي ما تقول Cool بس مش لذاذة أوي ، في سن صغير هتلاقيها حاجة صعبة شوية ، هتتعرض للتنمر وبعدين هتكبر هتلاقيها حاجة رايقة انك تكون مُختلف كدا ويمكن احنا محظوظين شوية اننا في مُجتمعنا بقينا نعرف نلم بعض ، ونتجمع ك ناس مُختلفين ، مش طول ال 24 ساعة أكيد ، بس أكيد في وقت بنتجمع ونحكي فيه ايه اللى حصل في الكام ساعة اللى فاتوا ولو مكنش عندنا وقت ل ده ، فأكيد بنستمتع بإختلافنا ..

الإختلاف بالنسبالي حاجة مش عارف أفسرها ، فأنا بالنسبالك مُختلف وإنت بالنسبالي مُختلف ، ف مين اللى صح ؟ أنا ولا أنت ؟ 

دا لو كان الإختلاف نفسه حاجة سلبية ، بس بالنسبالي هو الإختلاف حاجة إيجابية لو تعامل الناس معاه بإحترام ، وفي حاجة إخترعتها كدا بيني وبين نفسي توثيقًا لأول مرة أزور ستاربكس ..مبدأيًا يعني انا كُنت شايف إن ستاربكس هو للأغنيا بس وهو دا صح مفيش جدال عليه ، ومعنى إنه للأغنيا بس العالم اللى معاهم ايفون دول وال basics بتاعتهم هو التوب بالنسبالي أكيد كواحد عادي يعني ..

ستاربكس نفسه مُجتمع ، إتعرفت على ناس فيه ، العادي بتاعهم انه ممكن يجيب قهوته الصباحية من ستاربكس قبل ما يروح الشغل يعني معندهوش مانع يدفع 60 جنيه مثلًا في كوباية قهوة ع الصبح كدا كل يوم ولو هيقعد ويطلب معاها كيك بالشكولاته ف هيدخل في 100 ج ـ أكيد بالنسبالي دا فوق طاقتي شويتين تلاتة ان ممكن أفطر على عربية الفول بأققل من كدا ..بس بره موضوع الفلوس خلينا نرجع تاني لمُجتمع ستاربكس ..

وحبيت أصنفهم كدا وأحطهم في دايره ، الجماعة بتوع ستاربكس دول ، اللبس اللى انت بتشوفه الناس مُختلف انت ممكن تشوفه هناك عادي ، مفيش حد ممكن يحكم عليك هناك ، محدش بيبصلك اصلا ولا حد عارف انك موجود أساسًا ، كُل واحد في حاله ، مفيش حد هناك بيبيعلك أي حاجة ، يعني حتى الباريستا والكاشيير والناس دي مش مهتمه إنهم يحققوا من وراك حاجة زيادة أصلًا 

مثلا ممكن تروح مكان زي سوبر ماركت كدا ولا حاجة على أول ناصية الشارع اللى انت ساكن فيه تلاقي حد بيبيعلك حاجة ، بتاخد ربع جبنة بيحاول يخليه نص عشان هو أدرى إنك ممكن تحتاج النص مش الربع ..وهكذا يعني بتحاول تنزل في مكان من الميكروباص بيحاول ينزلك قدام شوية لأنه شايف ان دا أحسن ليك ، وبتحاول تحلق ، بيحاول يحلقلك حاجة تانية لأنه شايف ان دا مناسب عليك أكتر ..

وهكذا لكن في ستاربكس مفيش حد بيبيعلك حاجة ..وتوالت الزيارات بعد كدا وممكن تدخل تقعد عادي تعمل شغلك وتمشي ع اللاب ، تذاكر من غير ما تشرب حاجة عادي 😂😂 ودا فكرني تاني إن أنا معنديش مشكلة من دول طالما مش بتأذي حد إنت مُرحب بيك في أي وقت ودا مُجتمع مش مجرد كافيه ، واللى يخليني اققول عليه كدا هو إنه مش مجرد مكان بيقدملك أحلى قهوة أو فرابتشينو مثلا لا دا مكان بينشر أفكار مُختلف ، بالعكس مش بيحارب مُجتمعك اللى ماسك نفسه ومينفعش يتقال فيه كلام عيب ومينفعش تبقى مختلف فيه ..

أظن إن كان هيكون أفضل لو قولنا اننا بنحترم الكل طالما الكُل بيحترم الباقي ، بدلًا من محاولة طغيان فكر أو نشاط مجموعة على الباقي ، ودا خلاني اسأل نفسي  كيافع يعني لسه جاي من الريف والحجات دي بالنسباله كان بيشوفها على الفيسبوك بس والتجربة نفسها كانت شيقة ومليانة إثارة ودا خلاني عايز أتكلم برضو على الجواز ..

هل إحنا برضو في حاجة للجواز ؟

ولو يعني هو أكيد إحنا في حاجة للجواز ، دي مفيهاش كلام ، بس السؤال إمتى ؟

وعلى فكرة هو نفس المُجتمع برضو اللى إحنا عايشين فيه اللى بيخلينا متصربعين وعايزين نجري إلحق بسرعة عايز نتجوز ، ويلا بسرعة أخطب ، وإيه دا صحابي كلهم خطبوا ، إحنا مش زي بعض يا حبيبي أكيد .ز

ونتيجة لده بقا والصربعة بنت اللذينة دي الناس بتجري ورا حجات وبعدين يرجعوا يقولولنا لا للأسف متاخدش الخطوة دي هتندم ، بس تاخد خمس ثواني للتفكير تسمع تاني الكل يقولك يلا بسرعة اتجوز وخلف عيال يبقوا ادك تفهمهم ويفهموك 

وبفكر ازاي دي قصة حزينة يعني إنك تاخد أول 25 سنة من حياتك تحاول تعمل اللى أهلك بيطلبوه وتحاول تحققلهم أمنيتهم في إنك تتجوز وبعدين تجيبلهم حفيد يلعبوا بيه وبعدين تقضي ال 25 سنة التانية بتحاول تقضي إحتياجات ابنك وتحاول تخليه يحصل على حياة أفضل منك بقدر المُستطاع دا لو قدرت يعني ( والحياة الأفضل منك من منظورك بتجبره عليها طبعًا زي ما ابوك عمل معاك شوف ازاي 😎 ) وهكذا ودي كارثة يعني..وفي الآخر بتنسى إنك تعيش ..

عن القرارات الخاطئة وحجات تانية 

شخص رحمه الله وبحاول اتكلم معاه بما إني عرفت إنه دكتور يعني إعتزل المهنة في أول سنتين ليه كدكتور في الصعيد ورجع يشوف بقا المزرعة وساب الطب خالص ودي كانت أول مرة أشوف حد قدامي بالظبط عمل كدا ، وفي خلال كلامي معاه سألته سؤال :

دلوقت بعد ما بقا عندك 57 سنة أكيد ميسور الحال وأولادك في مكان كويس ومتربيين كويس جدًا مشاء الله ، إنت شايف إنك تسيب الطب بعد سنتين من بدايتك فيه كان قرار صح ؟ 

وفي لحظة أعتقد إن وضعته قدام الحقيقة اللى يمكن مفكرش فيها قبل كدا أو لم يتسنى ليه الوقت إنه يفكر فيها ، فإيه اللى حصل ؟

بص كدا ووفكر شوية وبعدين قال " لا طبعًا قرار غلط ..مش عارف ايه اللى خلاني اعمل كدا ..طيش شباب " 

المُهم دا خلاني مرعوب أكتر ، يعني أغامر بقرارات مش هعرف نتيجتها غير بعد 30 سنة ع الاققل، انت متخيل ، في نفس الوقت لو مأخدتش قرار هتبقى دي مشكلة تانية ، مش هتتعلم ومش هتتغير ..

في النهاية كونك مُختلف في مُجتمع مُختلف يُحترم